Prezident İlham Əliyevin ötən il avqustun 8-9-da ABŞ-yə gerçəkləşən tarixi səfərinin ildönümü Azərbaycan diplomatiyasının son illərdə qazandığı mühüm uğurların fonunda xüsusi əhəmiyyət daşıyır. Həmin səfər çərçivəsində qəbul edilən qərarlar, imzalanan Birgə Bəyannamə və aparılan yüksək səviyyəli danışıqlar təkcə Azərbaycan–ABŞ münasibətlərinin inkişafı baxımından deyil, bütövlükdə Cənubi Qafqazda yeni siyasi və iqtisadi reallıqların formalaşması baxımından mühüm mərhələ kimi qiymətləndirilir.Bunu Mediatvaz.com-a Müharibə, Əmək və Silahlı Qüvvələr Veteranları Təşkilatının sədri, polkovnik Cəlil Xəlilov bildirib ki, son illərin siyasi prosesləri Azərbaycanın beynəlxalq mövqelərinin ardıcıl şəkildə gücləndiyini nümayiş etdirir.
Onun sözlərinə görə, Azərbaycanın qazandığı diplomatik uğurlar təsadüfi xarakter daşımır: “Son illərin siyasi prosesləri göstərir ki, Azərbaycanın beynəlxalq mövqelərinin güclənməsi təsadüfi deyil. Bu, Prezident İlham Əliyevin uzunmüddətli strateji baxışa əsaslanan, milli maraqları prioritet hesab edən və dəyişən beynəlxalq şəraitə çevik uyğunlaşan siyasətinin nəticəsidir. ABŞ ilə münasibətlərdə müşahidə olunan yeni dinamika, eyni zamanda Azərbaycan-Ermənistan sülh gündəliyinin irəliləməsi də məhz bu siyasi xəttin məntiqi davamı kimi qiymətləndirilir.” Cəlil Xəlilov qeyd edib ki, Azərbaycan ilə ABŞ arasında münasibətlər müxtəlif mərhələlərdən keçib. Xüsusilə enerji təhlükəsizliyi, terrorizmlə mübarizə və regional sabitlik istiqamətlərində uzun illər ərzində formalaşmış əməkdaşlıq iki ölkə arasında münasibətlərin möhkəm təməlini yaradıb. Bununla yanaşı, müəyyən dövrlərdə siyasi fikir ayrılıqları və ABŞ tərəfindən irəli sürülən yanaşmalar ikitərəfli münasibətlərdə müəyyən gərginliklərə də səbəb olub.Lakin müasir geosiyasi reallıqlar göstərir ki, Azərbaycan və ABŞ arasında qarşılıqlı maraqlara əsaslanan əməkdaşlığın inkişafı üçün geniş imkanlar mövcuddur. Prezident İlham Əliyevin ABŞ-yə səfəri də məhz bu baxımdan xüsusi siyasi əhəmiyyət daşıyır. Səfərin əsas nəticələrindən biri iki ölkə arasında münasibətlərin yeni məzmunla zənginləşdirilməsi, qarşılıqlı əməkdaşlığın daha geniş sahələri əhatə etməsi və strateji maraqların uzlaşdırılması istiqamətində mühüm siyasi iradənin nümayiş etdirilməsi oldu. Azərbaycanın enerji siyasəti uzun müddətdir ki, yalnız ölkənin iqtisadi inkişafına xidmət edən amil kimi deyil, həm də Avropanın enerji təhlükəsizliyinə töhfə verən mühüm geosiyasi faktor kimi çıxış edir. Bakı-Tbilisi-Ceyhan neft kəməri, Cənub Qaz Dəhlizi və digər enerji layihələri Azərbaycanın beynəlxalq enerji xəritəsində rolunu əhəmiyyətli dərəcədə artırıb. Bu siyasət ölkəmizin etibarlı tərəfdaş kimi nüfuzunun möhkəmlənməsinə də ciddi təsir göstərib. ABŞ ilə münasibətlərin inkişafında enerji amili ilə yanaşı, Azərbaycanın nəqliyyat və logistika imkanları da mühüm əhəmiyyət kəsb edir. Azərbaycan Şərqlə Qərbi, Şimalla Cənubu birləşdirən mühüm nəqliyyat qovşağına çevrilməkdədir. Xüsusilə Orta Dəhlizin inkişafı ölkəmizin iqtisadi və geosiyasi əhəmiyyətini daha da artırır. Bu baxımdan Prezident İlham Əliyevin ABŞ səfəri çərçivəsində müzakirə olunan məsələləri yalnız ikitərəfli münasibətlər kontekstində qiymətləndirmək düzgün olmazdı. Səfərin nəticələri Cənubi Qafqazın gələcək inkişafı, regional kommunikasiyaların açılması, iqtisadi əməkdaşlığın genişləndirilməsi və davamlı sülhün təmin olunması baxımından da mühüm perspektivlər yaradır.Azərbaycanın ən böyük diplomatik uğurlarından biri isə Ermənistanla münasibətlərin sülh və normallaşma müstəvisinə keçirilməsidir. 44 günlük Vətən müharibəsindən sonra yaranmış yeni reallıqlar Azərbaycanın regionda siyasi çəkisini daha da artırıb. Azərbaycan həm hərbi-siyasi, həm də diplomatik müstəvidə öz milli maraqlarını ardıcıl və qətiyyətlə müdafiə etməklə regionda yeni münasibətlər sisteminin formalaşmasına mühüm töhfə verib.Bu gün Azərbaycan sülh gündəliyini irəli sürən, regional əməkdaşlığı təşviq edən və Cənubi Qafqazın gələcəyinə dair təşəbbüslərlə çıxış edən əsas dövlətlərdən biridir. Ermənistanla sülh prosesində əldə olunan irəliləyişlər də məhz Azərbaycanın uzunmüddətli və prinsipial diplomatik xəttinin nəticəsi kimi qiymətləndirilə bilər. Cəlil Xəlilovun fikrincə, Azərbaycanın mövqeyinin əsas üstünlüyü ondan ibarətdir ki, ölkə xarici siyasətdə milli maraqlarını qorumaqla yanaşı, beynəlxalq əməkdaşlığa da açıq mövqe nümayiş etdirir.“Azərbaycan bu gün həm regional, həm də qlobal miqyasda etibarlı tərəfdaş kimi qəbul olunur. Bunun əsas səbəblərindən biri ölkəmizin müstəqil xarici siyasət yürütməsi, müxtəlif güc mərkəzləri ilə qarşılıqlı hörmət və maraqlar əsasında münasibətlər qurmasıdır. Prezident İlham Əliyevin diplomatik fəaliyyəti Azərbaycanın milli maraqlarının beynəlxalq müstəvidə daha effektiv şəkildə müdafiə olunmasına imkan yaradıb”, – deyə polkovnik bildirib.Azərbaycan–ABŞ münasibətlərinin yeni mərhələsi iqtisadi əməkdaşlıq üçün də geniş imkanlar açır. Qarşılıqlı investisiyaların artırılması, yüksək texnologiyalar, rəqəmsal inkişaf, nəqliyyat, enerji və digər sahələrdə əməkdaşlığın genişləndirilməsi iki ölkənin iqtisadi potensialının daha səmərəli şəkildə birləşdirilməsinə imkan verə bilər.Burada Azərbaycanın işğaldan azad edilmiş ərazilərində həyata keçirdiyi genişmiqyaslı bərpa və quruculuq layihələri də xüsusi diqqət çəkir. Qarabağ və Şərqi Zəngəzurun yenidən qurulması, müasir infrastrukturun yaradılması, yaşıl enerji potensialının reallaşdırılması və regionun beynəlxalq nəqliyyat marşrutlarına inteqrasiyası Azərbaycanın gələcək iqtisadi inkişaf strategiyasının mühüm istiqamətlərindəndir.Bütün bunlar göstərir ki, Azərbaycan son illərdə əldə etdiyi siyasi və hərbi uğurları iqtisadi və diplomatik üstünlüklərlə tamamlayaraq yeni inkişaf mərhələsinə qədəm qoyub. Ölkənin artan beynəlxalq nüfuzu, etibarlı tərəfdaş imici və regional proseslərdə fəal rolu Prezident İlham Əliyevin həyata keçirdiyi çoxşaxəli siyasətin nəticəsidir.ABŞ səfərinin ildönümü də məhz bu baxımdan mühüm siyasi hadisə kimi yadda qalır. Səfər Azərbaycan diplomatiyasının imkanlarını bir daha nümayiş etdirməklə yanaşı, ölkəmizin regional sülh, təhlükəsizlik və əməkdaşlıq proseslərində konstruktiv rolunu təsdiqlədi.Bu gün qarşıda duran əsas vəzifə əldə edilmiş siyasi nəticələri davamlı sülhə, iqtisadi tərəqqiyə və regional əməkdaşlığa çevirməkdir. Azərbaycanın ortaya qoyduğu təşəbbüslər və Prezident İlham Əliyevin həyata keçirdiyi ardıcıl xarici siyasət bu istiqamətdə geniş imkanlar yaradır.Beləliklə, Prezident İlham Əliyevin ABŞ-yə tarixi səfəri Azərbaycan–ABŞ münasibətlərində yeni səhifənin açılması ilə yanaşı, Azərbaycanın beynəlxalq mövqelərinin daha da möhkəmlənməsi baxımından əlamətdar hadisə kimi qiymətləndirilə bilər. Səfərin yaratdığı siyasi və diplomatik imkanlar gələcəkdə iki ölkə arasında əməkdaşlığın daha da dərinləşməsinə, regionda sülh və sabitliyin möhkəmlənməsinə və Azərbaycanın iqtisadi potensialının yeni istiqamətlər üzrə reallaşdırılmasına mühüm töhfələr verə bilər.
Bu proseslərin fonunda Azərbaycanın əsas üstünlüyü isə dəyişməz olaraq qalır: milli maraqlara əsaslanan müstəqil siyasət, güclü dövlətçilik iradəsi və regionun gələcəyinə dair aydın strateji baxış.шаблоны для dle 11.2